မိုးကတဖွဲဖွဲ မစဲတမ်းရွာနေသော်လည်း ခရီးသည်များက တစ်ဦးချင်းအလိုက်၊ မိသားစုအလိုက်၊ အစုအဖွဲ့အလိုက် နေပြည်တော် ဘူတာဝင်းထဲ အဆက်မပြတ် ဝင်ရောက်လျက်ရှိသည်။ ရထားစောင့်ဆိုင်းနိုင်ရန်အတွက် သပ်သပ်ရပ်ရပ်စနစ်တကျ စီစဉ်ပေးထားသည့် ခုံနေရာများတွင် ခရီးသည်များနေရာယူကာ ခရီးစဉ်အတွက် အသင့်ပြင်ထားကြသည်။ ခရီးသည်များထဲတွင် နေပြည်တော် - ရန်ကုန်ခရီးစဉ်အတွက် လာရောက်သူကများသည်ကို သတိပြုမိသည်။ ရထားထွက်ချိန်က မွန်းတည့် ၁၂ နာရီ။