စာပေအကဲဖြတ်ဒိုင်ဖြစ်၍ (၇၃)နှစ်မြောက် တပ်မတော်နေ့ အထိမ်းအမှတ် စာပေပြိုင်ပွဲ ဆုပေးပွဲသို့ တက်ရောက်ခွင့်ရခဲ့သည်။ ကဗျာတို၊ ကဗျာရှည်ဆုရသူ ၁၀ ဦးအနက် နှစ်ဦးသာ လူလတ်ပိုင်းဖြစ်၍ ကျန်ကဗျာဆုရသူများမှာ အသက် အရွယ်ကြီးရင့်သူများဖြစ်ကြောင်း ဆုနှင်းသဘင် အခမ်းအနားတွင် တွေ့မြင်ရ၏။ တစ်ဖန် ၈-၄၂၀၁၈ ရက်နေ့က ကျင်းပခဲ့သော စိမ်းလန်းရွှေပြည် စာပေပြိုင်ပွဲ၌ စာမူနှင့်စာအုပ် ကဗျာဆုရသူတို့မှာ လူလတ်ပိုင်းနှင့် လူကြီးပိုင်းဝင်စပြုနေသူများ ဖြစ်ကြောင်း တွေ့ရပြန်၏။ ထို့ကြောင့် ဂန္ထဝင် ကဗျာစပ်နည်းသည် လူငယ်များကြားသို့ မှန်မှန်ကန်ကန်နှင့် ကျယ်ကျယ်ပြန့်ပြန့် ရောက်ကြပါရဲ့လား၊ အထိုက်အလျောက်ရေးတတ် စပ်တတ်သူတို့အတွက် ကဗျာလေ့ကျင့်ရေးကွင်းက နည်းပါးနေသလား၊ ဒါကြောင့် လက်ရည်တက် မလာကြတာလား၊ စဉ်းစားသုံးသပ်ဖွယ်ဖြစ်သည်။ ဂန္ထဝင်ကဗျာမျိုးဆက် ပြတ်မသွားအောင် အခြေခံကျကျ မည်သို့ဆောင်ရွက်သင့်သည်ကို အဖြေ ရှာကြည့်မိသည်။