ကျွန်တော်တို့ရဲ့ဘဝထဲမှာလည်းကောင်း၊ လူမှုကိစ္စအဝဝမှာလည်းကောင်း မကောင်းတာတွေ ခြစားတာတွေနဲ့ မပြီးမပြတ်ဖြစ်နေတဲ့ကိစ္စတွေကို ပစ်မှတ် (Focus) အဖြစ် ကြည့်မြင်ကြလေ့ရှိပါတယ်။ ဘယ်လိုကိစ္စတွေကို ဆောင်ရွက်ပြီးပြီလဲ၊ ကောင်းတာတွေနဲ့ မြင့်မြတ်တဲ့ကိုယ်ကျင့်တရားနဲ့ စိတ်ထား၊ ဒုက္ခဖိစီးမှုစည်းကို ဖြေလျှော့ခြင်းနဲ့ ဖွံ့ဖြိုးတိုးတက် လာမှုတွေကို ပိုအာရုံထားကြရမှာ မဟုတ်ဘူးလား။

ဇူလိုင်လ ၁၁ ရက်နေ့၊ ပုဂံ/ ညောင်ဦးဒေသသို့ နေ့ချင်းပြန်ခရီးသွားခဲ့သည်။ ရည်ရွယ်ချက်မှာ ပုဂံ ရှေးဟောင်းယဉ်ကျေးမှု နယ်မြေအတွင်းရှိ အရှေ့ဖွားစော၊ အနောက်ဖွားစော၊ မြင်းကပါ၊ ကုန်းတန်းကြီးနှင့်နတ်ကြိုအိုင်ကျေးရွာ အဝင်လမ်းများ၊ ရွာတွင်းလမ်းများကို သမဝါယမနှင့် ကျေးလက်ဖွံ့ဖြိုးရေးဝန်ကြီးဌာနက ပြုပြင်ဖောက်လုပ်ပေးလျက်ရှိရာ လုပ်ငန်းစတင်နိုင်မှု၊ ပြီးစီးမှုအခြေအနေများအား ကြည့်ရှုစစ်ဆေးရန်၊ လိုအပ်သည်များ ညှိနှိုင်းပေါင်းစပ်ဆောင်ရွက်ပေးရန် ဖြစ်ပါသည်။ ထိုနေ့ကကုန်းတန်းကြီးကျေးရွာသို့ အရင်သွားသည်။ ပြီးလျှင်ဖွားစောအရှေ့ရွာနှင့် အနောက်ရွာများသို့ရောက်ခဲ့သည်။ ထိုမှ လောကနန္ဒာစွယ်တော်မြတ်စေတီကို သွားရောက်ဖူးမြော်ခဲ့သည်။ ဘုရားဖူးပြီးပါက မဉ္ဇူသကနတ်ပန်းထုပ်လေးများ ရောင်းချနေကြသော ဈေးသည်လေးများနှင့် ခေတ္တခဏတွေ့ခွင့်ရအောင် စီစဉ်ပေးပါရန် ဂေါပကအဖွဲ့သို့ မေတ္တာရပ်ခံထားပေရာ ဓမ္မာရုံတစ်ခုအတွင်း၌ စုပေးထားပါသည်။ ၁၅ ယောက်ခန့် ရှိမည်ထင်ရ၏။ ကျွန်တော်ဝင်သွားချိန်မှာ အားလုံးကမျက်လုံးလေး တွေပေကလတ်ပေကလတ်နှင့် ကြည့်နေကြ၏။ သည်ဆရာ ငါတို့ကို ဘာများပြောမှာပါလိမ့်. . .။