လက်ပံပွင့်နီနီရဲများ၊ ရော်ရွက်ဝါညိုရင့်ရင့်များ၊ နွေနေခြည် ရွှေဝါရောင်များကြားမှ မတ်လ ၂၃ ရက်နေ့ ကမ္ဘာ့မိုးလေဝသနေ့အခါသမယသို့ ရောက်ရှိ လာခဲ့ပြီဖြစ်သည်။ မိုးလေဝသအချက်အလက်များသည် လူသားတစ်ဦးချင်းစီ၏ အသက်ဇီဝရှင်သန်မှုမှစ၍ ဤမြေကမ္ဘာငြိမ်းချမ်းရေးအထိများစွာ အကျိုးသက်ရောက်မှုရှိနေပါသည်။ ရာသီဥတုဖောက်ပြန်မှုနှင့် သဘာဝဘေးဒဏ်တို့ကြောင့် ဟိမဝန္တာမှသည် အမေဇုန်တောနက်အထိ ကမ္ဘာ့နေရာအနှံ့အပြားတွင် ဆိုးကျိုးသက်ရောက်မှုများ ဖြစ်ပွားလျက်ရှိရာ “ကြိုတင်ကာကွယ်ခြင်းသည် ကုသခြင်းထက်ပိုကောင်း၏” ဆိုသကဲ့သို့ ထိုသဘာဝ ဘေးဒဏ်များအား ကာကွယ်လျှော့ချရန်အတွက် နေ့စဉ် မိုးလေဝသတိုင်းတာစောင့်ကြည့်ရေး လုပ်ငန်းများသည် မရှိမဖြစ် အရေးကြီးလှပါသည်။

ရောင်နီမလာမီ အမှောင်ထုကြီးစိုးသည့် နံနက်အရုဏ်လေနုအေးအောက်၌ မြို့ပြလမ်းမများ တိတ်ဆိတ်ငြိမ်သက်လေ့ရှိသည်။ လူအများ နှစ်ခြိုက်စွာအိပ်မောကျနေချိန် တာဝန်အရ ထမ်းပိုးထားရသည့် သေနတ်တို့၏ပခုံးရှင်များ တိတ်တဆိတ်စစ်ချီနေခြင်းများ ရှိနိုင်သည်။