နေပြည်တော် ဧပြီ ၂၆
ကချင်ပြည်နယ်၊ မြစ်ကြီးနားမြို့၊ အောင်ဇေရန်အောင်သပြေတစ်ထောင်ကျောင်းတိုက်၌ ရွှေကောင်းမှုတော်စေတီ ထုံးသင်္ကန်းဆက်ကပ်ပူဇော်လှူဒါန်းပွဲ၊ ဗုဒ္ဓဘိသေက အနေကဇာတင်လှူပွဲနှင့် ရွှေဘုန်းမြင့်စေတီတော် စိန်ဖူးတော်၊ ငှက်မြတ်နားတော် တင်လှူပူဇော်ပွဲကို ယနေ့နံနက်ပိုင်းက အဆိုပါကျောင်းတိုက်ဝန်းအတွင်း၌ ပြုလုပ်ရာ မြစ်ကြီးနားမြို့၊ ဓမ္မရက္ခိတဝန်းသိုကျောင်းတိုက် ဆရာတော် ဘဒ္ဒန္တကေတုမာလာ အမူးပြုသော သံဃာတော်များကြွရောက်တော်မူကြပြီး မြောက်ပိုင်းတိုင်းစစ်ဌာနချုပ် တိုင်းမှူး ဗိုလ်ချုပ် အောင်ဇော်ထွေးနှင့် တာဝန်ရှိသူများ၊ အရာရှိ၊ စစ်သည်၊ မိသားစုဝင်များ၊ အလှူရှင်များနှင့် ဒေသခံတိုင်းရင်းသားပြည်သူများ တက်ရောက်ကြသည်။
ဦးစွာ တိုင်းမှူးနှင့်တက်ရောက်လာကြသူများက ရွှေကောင်းမှုတော်စေတီတော်အား ဗုဒ္ဓဘိသေကအနေကဇာတင် လှူပူဇော်ပြီး မြစ်ကြီးနားမြို့၊ ဓမ္မရက္ခိတဝန်းသိုကျောင်းတိုက် ဆရာတော် ဘဒ္ဒန္တကေတုမာလာထံမှ ကိုးပါးသီလနာယူဆောက်တည်၍ သံဃာတော်များမှ အန္တရာယ်ကင်းပရိတ်တရားတော်မြတ်များအား ရွတ်ဖတ်ပူဇော်ကြသည်။ ထို့နောက် တိုင်းမှူးနှင့်တာဝန်ရှိသူများက စိန်ဖူးတော်၊ ငှက်မြတ်နားတော်များနှင့် အရန်စေတီထီးတော်များအား ဆရာတော် ဘဒ္ဒန္တကေတုမာလာထံသို့ ဆက်ကပ်လှူဒါန်းကြပြီး လှူဒါန်းမှုအစုစုအတွက် ရေစက်သွန်းချအမျှပေးဝေကြသည်။ ယင်းနောက် ရွှေဘုန်းမြင့်စေတီတော်အား လက်ယာရစ်သုံးကြိမ်လှည့်လည်ပူဇော်၍ စိန်ဖူးတော်၊ ငှက်မြတ်နားတော်နှင့် အရန်စေတီထီးတော်များအား အမွှေးနံသာရည်များ ပတ်ဖျန်းပူဇော်ကြသည်။ ၎င်းနောက် တိုင်းမှူးနှင့်တာဝန်ရှိသူများသည် စိန်ဖူးတော်နှင့် ငှက်မြတ်နားတော်အား ရွှေဘုန်းမြင့်စေတီတော်ကြီး၌ တင်လှူပူဇော်ခဲ့ပြီး ရတနာရွှေမိုးငွေမိုးများအား ရွာသွန်းခဲ့ကြောင်း သတင်းရရှိသည်။
